Dy shtetas, Dhimitër Peqini dhe Artan Lila, janë arrestuar në Elbasan pasi dyshohen për falsifikim dokumentesh dhe pasaportash.
Sipas Prokurorisë së Elbasanit, ata kanë falsifikuar letërnjoftime, pasaporta dhe leje qëndrimi, duke krijuar mundësinë e përdorimit të këtyre dokumenteve të rreme.
Gjatë kontrollit të banesave të të dyshuarve, policia ka sekuestruar pajisjet që përdornin për prodhimin e dokumenteve të falsifikuara. Prokuroria ka paraqitur kërkesën në Gjykatë për masën e sigurisë “Arrest në burg” për Peqinin dhe Lalën.
Njoftimi i Prokurorisë:
Falsifikonin ID, pasaporta, leje qëndrimi shqiptare e të huaja, arrestohen me kërkesë të Prokurorisë Elbasan shtetasit Dh.P dhe A.L. Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Elbasan, u arrestuan shtetasit Dh.P. dhe A.L. të dyshuar për veprat penale të “Falsifikimit te dokumentave”, “Falsifikimi i leternjoftimeve, i pasaportave ose i vizave” dhe “Prodhimi i mjeteve për falsifikim të dokumenteve” parashikuar nga neni 186, 189 dhe 192 i K.Penal.
Në kuadër të procedimit penal nr.1525, viti 2024, ndjekur me metoda speciale hetimi (vëzhgime ambjentale dhe veprime simuluese), pas kryerjes së veprimeve hetimore ka rezultuar se shtetasit Dh.P. dhe A.L., në bashkëpunin me njëri-tjetrin kryenin veprimtarinë e kundërligjshme të falsifikimit të dokumentave të ndryshëm si leje drejtimi, Letërnjoftime ID, leje qëndrimi etj., shqiptare dhe të huaja (italiane, belge, greke, bullgare, rumune etj.). Këtë veprimtari këto shtetas e kryenin kundrejt shpërblimit.
Në kuadër të veprimit simulues Prokuroria pranë Gjykatës së Shkallës së Parë të Juridiksionit të Përgjithshëm, Elbasan ka sekuestruar dokumentat e falsifikuara me gjeneralitetet e krijuara (që janë fiktive). Ndërsa nga kontrolli i banesave të personave nën hetim u sekuestruan pajisjet që shërbenin për prodhimin e dokumentave të falsifikuar. Prokuroria Elbasan ka depozituar në Gjykate kërkesat për vleftësim të ligjshëm të ndalimit dhe caktimin e masës të sigurimit me karakter shtrëngues “Arrest në burg”.
