Ndalohet me urdhër të prokurorisë biznesmeni në Tiranë dhe dy shtetas të tjerë.
Mësohet se është arrestuar Dritan Llanaj, pronar i firmës ndërtuese “Mesapliku 05 shpk” dhe shtetasit Kadri Pazari e Arben Caci.
Ndalimi i këtyre personave është bërë pasi dyshohet se kanë falsifikuar dokumentat për 25 mijë metër katror tokë në Laprakë.
Bëhet fjalë për një sipërfaqe toke në Laprakë që është pronë e spitalit të Traumës. Të arrestuar me Llanaj janë edhe Kadri Pazari dhe Arben Caci ndërsa prangosjen e tyre e ka urdhëruar prokurori Ervin Karanxha i cili ka zbuluar gjatë hetimit edhe falsifikimin e letrave të pronësisë.
Sipas hetimeve, nga Pazari e Caci toka i është kaluar ndërtuesit Llanaj, i cili është shprehur se e ka blerë tek dy pronarët pa pasur dijeni për falsifikimin.
Në këtë pronë në perimetrin e spitalit ishte planifikuar edhe një ndërtim për të cilin tashmë është vendosur pezullimi.
Llanaj njihet si ndërtues që ka pasur probleme me ligjin edhe më herët në raport me mashtrimin e qytetarëve dhe pronat ndërsa ka fituar lirinë.
Po ashtu rezulton se Llanaj kishte lidhur edhe kontrata shit-blerje me qytetarët për ndërtimet që do bëheshin në zonën e 25 mijë m2 të falsifikuara tek ish-spitali ushtarak.
Biznesmeni Llanaj është arrestuar edhe më herët nga policia pasi mbi të rëndonin tre akuza: Ndërtim i paligjishëm (zona e Unazës së Re), falsifikim dokumentash dhe mashtrim me pasoja të rënda.
Por vetëm pak ditë pas arrestimit Gjykata e Apelit e ka lënë të lirë në tetor të 2018 duke i ndryshuar masën në “detyrim paraqitje”.
Ndërkohë sot është arrestuar sërish me akuzën e falsifikimit të dokumentave.
