Fakulteti i Drejtësisë, konkretisht dekani, Artan Hoxha, ka lajmëruar se është gjetur një mënyrë alternative për zhvillimin e mësimit të atyre studentëve që dëshirojnë të vazhdojnë programim.
Sipas lajmërimit mësimi do të zhvendosej në godinën e një gjimnazi, por pa përmendur emrin, ndërsa tani në një njoftim të dytë kemi edhe gjimnazin, ku prej ditës së nesërme rifillojnë mësimin studentët e Drejtësisë.
Procesi mësimor do të transferohet në ambientet e gjimnazit “Petro Nini Luarasi” dhe leksionet fillojnë në orën 14:00.
Studentët e Fakultetit të Drejtësisë kanë pasur edhe një përplasje mes tyre mëngjesin e djeshëm, ku një pjesë kanë tentuar të hyjnë brenda ambienteve të ngujimit të studentëve të tjerë, mirëpo janë ndaluar nga këta të fundit, nga raportimet, me dhunë. Kjo gjë ka çuar në daljen publike të dekanit, Artan Hoxha, i cili ka thënë se ishte në bisedime me Ministrinë e Arsimit për gjetjen e një godine alternative. Tashmë godina është gjetur dhe prej ditës së nesërme mësimi për këtë fakultet do të zhvillohet normalisht.
Njoftimi i Fakultetit të Drejtësisë
Njoftohet i gjithë personeli akademik dhe studentët e ciklit të parë dhe të dytë të Fakultetit të Drejtësisë Universiteti i Tiranës, se nesër në datë 30.01.2019, ora 14.00, rifillon procesi mësimor në ambientet e gjimnazit “Petro Nini Luarasi”
