Mbrëmjen e djeshme, Franca nuk ia doli të fitojë ndaj Zvicrës dhe përfundoi e mundur me penallti 5-4, pasi e gjithë ndeshja (120 minuta) u mbyll me shifrat 3-3. Përgjegjësi të madhe në këtë disfatë të rëndë, mban edhe i riu Kylian Mbappe, i cili humbi penalltinë që i dha kualifikimin Zvicrës.
Direkt pas ndeshjes, Mbappe la fushën i zhgënjyer dhe nuk foli për asnjë media. Gjithsesi, nuk vendosi të qëndrojë totalisht në heshtje, pasi i tha fjalët e tij pas ndeshjes në një postim në Twitter. U kërkon falje të gjithëve dhe shprehet se do kthehet me i fortë.
POSTIMI I MBAPPE – “Shumë e vështirë për të kthyer faqen. Trishtimi është i pamasë pas këtij eliminimi, nuk mundëm ta arrinim qëllimin tonë. Më vjen shumë keq për atë penallti. Doja të ndihmoja ekipin, por dështova. Do e kem shumë të vështirë të fle gjumë, por fatkeqësisht këto janë risqet e këtij sporti, të cilin e dua shumë.
E di që ju (drejtuar tifozëve) jeni të zhgënjyer, gjithsesi doja t’ju falënderoja për mbështetjen tuaj dhe që gjithmonë keni besuar te ne. Gjëja më e rëndësishme tani do jetë të ngrihem më i fortë për vitet e ardhshme. Urime dhe fat të mbarë Zvicrës”, shkroi Kylian Mbappe në faqen e tij.
