“Arrest me burg” kjo është masa që Gjykata e Shkodrës ka dhënë në mugesë për dy djemtë e ish-prefektit të Shkodrës Paulin Radovani, të cilët ndodhen jashtë vendit.
Radovani ishte personi që “çmontoi” skemën e fajdeve në Shkodër. Pasi ai denoncoi fenomenin në polici, Prokuroria nisi një procedim penal në fund të janarit.
Për ish-prefektin, gjykata dha masën e ndalimit për t’u larguar jashtë shtetit dhe detyrim paraqitje.
Ish-nënprefekti u pajis me eskortë mbrojtje dhe më pas denoncoi në polici grupin e fajdexhinjve, pasi dy djemtë e tij të larguar tashmë nga Shqipëria, kishin marrë shuma të mëdha borxhesh me interes.
Skema e fajdeve ka rezultuar fatale për dhjetëra familje, të cilat huadhënësit u kanë marrë pronat, në momentin kur nuk kanë shlyer detyrimin.
Pas dy muaj përgjimesh, policia vendosi në pranga 12 persona dhe sekuestroi shuma parash dhe automjete.
Në grupin e fajdexhinjve në kryeqendrën e veriut, rezultojnë të jenë përfshirë noterë, avokatë dhe një efektiv i policisë.
