Ministrja e Punëve të Jashtme, Olta Xhaçka së bashku me ambasadoren e SHBA-ve në Tiranë, Yuri Kim këtë pasdite kanë vizituar familjet e evakuuara nga Afganistani të cilat janë vendosur në Qytet Studenti, në Tiranë.
Me anë të një postimi në rrjetet sociale, Xhaçka ka shkruar se shumë partnerë e organizata ndërkombëtare po bashkohen çdo ditë në këtë operacion të madh humanitar ndërsa vlerëson mikpritjen shqiptare. Po ashtu ajo ka bërë me dije se shumë qytetarë të tjerë janë evakuuar në Lezhë dhe në Durrës.
“607 qytetarë afgan, burra, gra dhe fëmijë kanë gjetur sot një strehë të sigurt në Shqipëri. Sot me ambasadoren Kim vizituam familjet e vendosura prej 3 ditësh në qendrën akomoduese në Qytetin e Studentit, ndërsa shumë të tjerë janë sistemuar në Durrës dhe Lezhë. Shumë partnerë e organizata ndërkombëtare po bashkohen çdo ditë në këtë operacion të madh humanitar. Krenari për mikpritjen shqiptare!”- shkruan Xhaçka.
Kujtojmë se deri më tani kanë ardhur në vendin tonë 607 qytetarë afganë të cilët janë vendosur përkatësisht në Tiranë, Durrës dhe Lezhë. Kryeministri i vendit, Edi Rama ka bërë me dije se në vendin tonë priten të vijnë rreth 4 mijë afganë. Kujtojmë se situata në Kabul mbetet shqetësuese, pasi sulme kamikazë të njëpasnjëshme kanë ndodhur ku kanë mbetur të vdekur, civilë, fëmijë dhe ushtarë amerikanë.
