Autoritetet evropiane kanë zbuluar një shërbim të koduar të mesazheve, i quajtur “Matrix”, që përdorej për trafikun ndërkombëtar të drogës dhe armëve.
Zbulimi i këtij aplikacioni ka ndodhur rastësisht dhe i ka mundësuar autoriteteve holandeze akses në 2.3 milionë mesazhe, të cilat janë shkruar në 33 gjuhë të ndryshme, përfshirë gjuhën shqipe.
Zëri.ai ka mundur që të kontaktojë me zyrën e shtypit të Europol dhe ka konfirmuar se materiali i grumbulluar është tashmë në duar të autoriteteve holandeze dhe franceze, dhe është në dorën e tyre për të vendosur se çfarë do të bëjnë me të.
Gjuha shqipe ka qenë një nga më të përdorurat në këtë rrjet dhe materialet mund të përdoren për hetime të mëtejshme, siç ka ndodhur më parë me aplikacione të tjera të koduara si “Encrochat” dhe “SkyECC”, që çuan në goditjen e grupeve kriminale në Shqipëri dhe jashtë saj.
Tashmë mbetet të shihet nëse të dhënat nga “Matrix” do të dorëzohen në Shqipëri për hetime të mundshme.
