Ditën e sotme Raportuesja për Shqipërinë në Parlamentin Evropian, Isabel Santos është shprehur se dialogu mes opozitës dhe qeverisë është i rëndësishëm për të garantuar Vettingun si dhe vazhdimin e Reformës në Drejtësi.
Gjatë një konferencë për mediat, Santos tha se Shqipëria duhet ti marrë parasysh të gjitha rekomandimet e OSBE-ODIHR-it dhe t’i vënë në zbatim ato. Ajo gjithashtu u shpreh se qeveria ka kopnfirmuar se është tërhequr në lidhje me projektligjin për mediat.
“Besoj që opozita dhe mazhoranca do kenë një angazhim në të ardhmen duke marrë parasysh interesat e Shqipërisë, dhe interesi i Shqipërisë është zgjatja e mandatit të Vetingut. Integrimi i qytetarëve të Shqipërisë në BE po ndodh dita ditës falë kësaj pune që po bëhet. Janë shenja të qarta dhe të pamohueshme të solidaritetit evropian për Shqipërinë. Në PE kemi qenë të qartë, kemi thënë që Shqipëria është gati për hapin tjetër të integrimit, po ashtu në KE. Sa i takon disa çështjeve që kam ngritur, jam e kënaqur që Kuvendi ka filluar punën dhe dialogun demokratik mes mazhorancës dhe opozitës. E kuptoj rëndësinë e Kuvendit, si foltorja që përfaqëson vullnetin e qytetarëve. Ky dialog është i rëndësishëm për të garantuar Vetingun dhe vazhdimin e Reformës në Drejtësi. Tashmë që dyert e dialogut mes përfaqësuesve janë të hapura mendoj që është e rëndësishme të vihen në zbatim rekomandimet e OSBE-ODIHR për reformën zgjedhore. Kjo është e rëndësishme për zgjedhjet e tjera që do ketë Shqipëria. Sa i takon ligjit për median mora konfirmimin që mazhoranca nuk do të vijojë me këtë projekt-ligj. Shqipëria të marrë parasysh rekomandimet për ligjin e medias. Ka ardhur koha që Shqipëria të vazhdojë me punën me reformat. Pas takimeve e shoh qartë që edhe ndjesia në Shqipëri është shumë pro-evropiane”, tha Santos.
