Shqipëria U-17 e ka nisur me këmbë të gabuar Kampionatin Europian që po zhvillohet në vendin tonë.
Të rinjtë kuqezi, nën drejtimin e trajnerit Andrea Tedesco, u mposhtën me rezultatin e thellë 0-4 nga Portugalia në sfidën hapëse të grupit A, që u luajt në “Arena Kombëtare”.
Skuadra portugeze dominoi në të gjitha aspektet e lojës, duke konfirmuar statusin si një nga favoritët kryesorë për titullin.
Quintas ishte futbollisti i golit të parë në minutën e 36-të, ndërsa pjesa e dytë solli edhe tre gola të tjerë nga Mide, Cabral dhe Soares, që vulosën fitoren e pastër të luzitanëve.
Shqipëria ndodhet në një grup shumë të fortë ku, përveç Portugalisë, bëjnë pjesë edhe Franca dhe Gjermania. Europiani U-17 organizohet nga FSHF dhe ndeshjet luhen në katër stadiume: “Arena Kombëtare”, “Elbasan Arena”, “Egnatia Arena” dhe “Niko Dovana”.
