Euro ka shënuar një tjetër rekord negativ në tregun valutor shqiptar, duke rënë për herë të parë pas më shumë se 16 vitesh nën kufirin e 98 lekëve. Sipas kursit zyrtar të publikuar nga Banka e Shqipërisë, një euro po këmbehet aktualisht me 97.99 lekë.
Rënia e ndjeshme e valutës europiane vjen në një moment kur vendi ndodhet në prag të zgjedhjeve të 11 majit, ndërsa fluksi i lartë i turistëve të huaj po ushtron presion shtesë mbi kërkesën për valutë vendase. Edhe dollari amerikan ka ndjekur një trajektore të ngjashme, duke u këmbyer me 86.54 lekë – niveli më i ulët që prej 2007-s.
Tendenca e kursit të këmbimit tregon për një trysni të vazhdueshme drejt forcimit të lekut, që pritet të vijojë edhe gjatë muajve në vijim. Vitin e kaluar, Banka e Shqipërisë ndërhyri për të frenuar këtë prirje përmes blerjeve masive të valutës. Në total, në vitin 2024, Banka Qendrore bleu rreth 933 milionë euro në tregun vendas – shifra më e lartë historike e ndërhyrjeve të saj, duke shënuar një rritje prej 249% krahasuar me vitin paraardhës.
Ndërkohë që inflacioni vijon të mbetet nën objektivin zyrtar prej 3%, pritet që Banka e Shqipërisë të jetë e gatshme të ndërhyjë sërish nëse rënia e euros vijon, për të shmangur ndikimet negative në ekonominë vendase.
