Euro, nga data 8 nëntor, sot ka ndalur për herë të parë rënien në tregun e brendshëm.
Sipas kursit zyrtar të Bankës së Shqipërisë, një euro sot u këmbye me 123. 03 lekë duke u rritur me 0.34 lekë në krahasim me ditët e mëparshme. Kjo shënohet si rritja më e madhe ditore që nga data 7 qershor.
Ekspertët e këmbimit valutor pohojnë se dy janë arsyet kryesore të kësaj rritjeje.
Së pari, gjatë tre ditëve të fundit për shkak të Krishtlindjeve janë rritur blerjet e konsumatorëve dhe bizneset sot kanë nxituar të dorëzojnë në banka paratë, duke ndikuar në këtë mënyrë në rritjen e qarkullimit të parasë në monedhën vendase.
Së dyti është vënë re një kërkesë e shtuar për valutë, me individët që kanë nxituar të blejnë euro, pasi blerja e saj ishte tepër e leverdishme nga njëra anë dhe nga ana tjetër, individët që do të kalojnë pushimet jashtë vendit po këmbejnë valutë.
Nga mesi i muajit shtator euro ka rënë me shpejtësi në tregun vendas duke arritur vlerën më të ulët në dekadën e fundit.
Sipas guvernatorit të Bankës së Shqipërisë disa ditë më parë, tha se banka ka blerë më shumë se 400 milionë euro valutë.
Ai gjithashtu tha se arsyet e nënçmimit të euros lidhet me konvertimet e kapitalit të bankave dhe disbursimin e një kredie të Berzh.
Përveç kësaj, ka ndikuar dhe rritja e eksporteve e investimeve të huaja që kanë shtuar ofertën për valutë në treg.
Sejko tha se është e vështirë të parashikohet se si do të jetë kursi i këmbimit në të ardhmen, ndonëse Banka preferon që ai të jetë sa më i qëndrueshëm.
/Monitor/
