Ka përfunduar edhe ndeshja e dytë e Grupit A në Euro 2020, ku pas Italisë e cila fitoi 3-0 ndaj Turqisë, ishte radha e Uellsit dhe Zvicrës të zbrisnin në fushë, takim që përfundoi 1-1. Në këtë Grup deri në këto momente kryeson Italia me tre pikë. Pjesa e parë u mbyll me barazimin 0-0 me skuadrën Helvete që i krijoi më shumë raste shënimi sidomos me Seferovic edhe pse momentin më të rrezikshëm e pati Schaer. Për Uellsin më i miri në këto 45 minuta të para ishte Daniel James që arriti t’i japë mundësinë skuadrës britanike që të ketë një shans shënimi me një krosim në drejtim të Kieffer Moore, ndërkohë që Gareth bale deri në pushimin e sfidës ishte inekzistent në fushën e lojës.
Zvicra e mori shpërblimin e saj për lojën e zhvilluar në pjesën e parë, në fillimin e 45 minutave të dyta kur shënoi golin e avantazhit me Embolo pas një asistimi të Xherdan Shaqirit në një goditje këndi. Zvicra, po me Embolo kishte edhe mundësi të tjera për të thelluar avantazhin.
Por Uellsi nuk dorëzohet. Nuk ka çfarë të humbë dhe sheh për nga porta kundërshtare. Dhe në 75’ vjen goli i barazimit me Moore, që po me kokë i përgjigjet rivalit. Zvicra shënon golin e dytë në 84’, por Gavranovic ishte jashtë loje. Mbyllet në barazim 1-1, ndeshjet e radhës në grup janë: Itali-Zvicër dhe Turqi-Uells.
