Për 6 ditë me rradhë, 5-10 Shtator do të zhvillohen eleminatoret e rradhës në rrugën drejt “Euro2020”. Gjermani vs. Holandë është ndeshja më e fortë por spikasin edhe sfida të tjera, duke nisur nga transferta e kuqezinjve në Francë ndaj kampionëve të fundit në Botë. Grupi H ka 3 skuadra me 9 pikë pas 4 ndeshjeve të para që ndiqen nga Shqipëria me 3 pikë më pak. Transferta e të shtunës pritet të ketë ndikimin e saj në klasifikim, dhe kuqezinjtë që shpresojnë për një pikë, mund t’ju bëjnë një dhuratë të vyer Islandës dhe Turqisë.
Në gr. A, Kosova ka një pikë më pak se Anglia dhe Cekia, të cilën e pret të shtunën në Prishtinë. Sfida është e hapur dhe “Dardanët” besojnë te befasia që mund të shkaktojnë. Futbolli në cilësinë e tij më të mirë, kështu e quan Franz Beckenbauer sfidën mes Gjermanisë dhe Holandës. Tre sfida në 12 muajt e fundit prodhuan 12 gola. Tulipanët i zbritën një Ligë më poshtë në Ligën e Kombeve, ndërsa panzer’at u hakmorën në eleminatoren e parë drejt “Euro2020”.
Një fitore e vendasve në Hamburg do ti afronte në krye me Irlandën e Veriut, ndaj të cilës luajnë në transfertën e 9 Shtatorit. Fituese e të parit edicion në Ligën e Kombeve, Portugalia e sheh veten poshtë në klasifikimin e gr. B. Traineri Fernando Santos e di që ndaj Serbisë dhe Lituanisë janë dy sfida decizive, nëse luzitanët duan të kualifikohen si fitues të grupit. Teemu Pukki shpreson që formën e mirë në Premier League, ta eksportojë në kombëtaren finlandeze. E cila përballë Greqisë dhe Italisë vë shumë në lojë për kualifikimin. Gareth Southgate në krye të “Tre Luanëve” kërkon të ruajë serinë pozitive të eleminatoreve pa humbje në shtëpi, për pothuajse 2 dekada, kur të luajë ndaj Bullgarisë të shtunën. Spanja duket në rrugë të mbarë për kualifikimin e 14’të rradhazi, ndërsa Suedia dhe Norvegjia kanë një derbi nordik për ndjekjen e iberikëve.
Në fund, vendimi i Xherdan Shaqirit. Talismani helvet u tërhoq përkohësisht nga Zvicra gjë që coi në një rindërtim të kombëtares për sfidat ndaj Irlandës dhe Gjibraltarit.
