Sot luhen dy sfidat e fundit të raundit të parë të fazës së grupeve të Euro 2020, më konkretisht dy sfidat e grupit F. Ky grup, është konsideruar nga të gjithë si “grupi i ferrit”, pasi ka tri ekipe favorite, si Franca (kampione e botës në fuqi), Portugalia (kampione në fuqi e Europës), dhe Gjermania, kampione e botës në vitin 2014.
Ndërsa Hungaria, duket e humbur ende pa filluar ndeshjet, pasi konsiderohet si ekipi më i dobët në letër. Në orën 18:00, luhet sfida e parë mes Hungarisë dhe Portugalisë, ku Cristiano Ronaldo dhe luzitanët do të kërkojnë medoemos fitoren, për ta nisur në mënyrën e duhur këtë Europian.
Ndërsa në mbrëmje, e gjithë vëmendja do të jetë te finalja e parakohshme, Francë-Gjermani. Kjo sfidë do të startojë në orën 21:00 dhe shumë yje do të zbresin në fushën e lojës. Pogba, Griezmann, Mbappe, Kroos, Sane, Gnabry e të tjerë janë vetëm disa nga emrat e mëdhenj që do të zbresin në fushë në këtë takim.
Nga shumica, kjo sfidë konsiderohet edhe si një finale e parakohshme, pasi këto dy kombëtare fare mirë mund t’i shkojnë deri në fund këtij europiani. Kujtojmë se nga faza e grupeve, kualifikohet edhe ekipi që renditet në vend të tretë, pas llogaritjes në rezultate me ekipet e grupeve të tjera që janë renditur në vendin e tretë.
Euro2020, grupi F
Hungari – Portugali 18:00
Francë – Gjermani 21:00
