I ftuar në programin “FitStation” në News24 me moderatoren Çenkuela Hasa, analisti Shpend Gashi ngriti shqetësimin e tij mbi ndikimin e medias në edukimin e shoqërisë.
Gjatë intervistës, ai kritikoi mënyrën se si media po promovon figura dhe modele të gabuara, të cilat ndikojnë negativisht tek të rinjtë, veçanërisht tek vajzat e reja.
“Mediat promovojnë antivlera. Sot shikon eskortat që janë bërë moderatore dhe që prezantohen si modele jete për vajzat e reja. Shpesh, njerëz pa integritet e moral shfaqen si personazhe të famshëm,” tha Gashi.
Ai theksoi gjithashtu se shumë emisione argëtuese, përfshirë ato që transmetojnë situata të mbyllura me personazhe të ndryshëm, nuk kanë asnjë vlerë edukative.
“Çfarë interesi ka publiku të dijë çdo detaj të jetës së 20 vetave të mbyllur në një shtëpi?” shtoi ai.
Në fund, Gashi apeloi për një ndryshim në përmbajtjen mediatike, duke theksuar se media ka një përgjegjësi të madhe në edukimin e brezave të rinj.
