Gazetarja Aida Topalli ka hedhur dritë mbi një fenomen që po merr përmasa gjithnjë e më të mëdha në Shqipëri: prostitucioni i sofistikuar në formën e eskortës, veçanërisht mes vajzave të njohura të ekranit dhe showbizit. E ftuar në emisionin “Zgjohu me MCN”, ajo deklaroi se tashmë nuk flitet më për prostitucion të rrugës, por për një sistem të organizuar ku pagesat shkojnë deri në 150 mijë euro për një javë, në rastet kur përfshihen personazhe të njohur.
Sipas saj, një vajzë e njohur e ekranit ka përfituar këtë shumë nga një figurë e rëndësishme e botës së krimit, për një marrëveshje që përfshinte ekskluzivitetin dhe qëndrim jashtë vendit për një javë. Topalli theksoi se tregu i eskortës në Shqipëri është i pakontrolluar, pa licencim dhe pa asnjë kontroll mjekësor, çka përbën një rrezik serioz për shëndetin publik, për shkak të përhapjes së sëmundjeve seksualisht të transmetueshme.
“Tirana mban vendin e parë, por në verë aktiviteti zhvendoset edhe në zonat bregdetare. Vajzat marrin me qira apartamente përmes platformave si Airbnb dhe ushtrojnë aktivitetin pa certifikata apo kontrolle shëndetësore”, u shpreh gazetarja, duke përmendur se për pagesa më të ulëta shifrat variojnë nga 1 mijë deri në 5 mijë euro për shoqërim brenda territorit shqiptar, ndërsa shifrat për eskortat VIP tejkalojnë këto nivele.
Topalli përmendi gjithashtu ardhjen e vajzave nga vende të tjera si Kolumbia, Brazili apo Filipinet, të cilat përfshihen në këtë treg në Shqipëri për shkak të mungesës së rregullimit ligjor. Sipas saj, prostitucioni në disa vende të Bashkimit Europian është i legalizuar dhe shoqërohet me kontrolle rigoroze shëndetësore, ndërsa në Shqipëri kjo ndodh në mënyrë të paligjshme, duke krijuar një terren të rrezikshëm si për shëndetin, ashtu edhe për sigurinë e përfshirëve.
“Ka ndodhur edhe që këto vajza të bien pre e shantazheve, përmes videove të regjistruara pa dijeninë e tyre. Është një profesion që sjell shumë përfitime monetare, por ka një dëm moral të parikuperueshëm”, tha ajo, duke shtuar se tashmë shumë nga ato që më parë shkonin në Dubai, janë kthyer në Shqipëri për të ushtruar aktivitetin, pas masave të forta ndërkombëtare dhe ekstradimeve të shumta.
Sipas gazetares, vajzat që shihen në ekran nuk janë thjesht personazhe të botës së televizionit apo rrjeteve sociale, por shpesh janë objekte ankandi për biznesmenë dhe figura të krimit, ku çmimi shkon për atë që ofron më shumë. Rasti i vajzës që mori 150 mijë euro për një javë është, sipas saj, vetëm maja e ajsbergut të një fenomeni shumë më të gjerë dhe të organizuar.
