Ditën e djeshme në Kurbin në afërsi të fshatit, Adriatik është gjetur një një kafkë njeriu. Fillimisht eshtrat janë zbuluar rastësisht nga banorët e zonës në rrugën e fshatit Adriatik, të cilët më pas kanë njoftuar menjëherë Policinë e Shtetit.
Ndërsa nga hetimet ende nuk ka të dhëna zyrtare në lidhje me eshtrat e gjetura në zonën e Fushë Kuqes, nga të dhënat paraprake mendohet se i përkasin një të riu.
Theksojmë se janë të shumtë personat që janë të zhdukur në këtë zonë, por aktualisht banorët kanë nisur të flasin për zhdukjen e një adoleshenti 6 vite më parë.
Nga të dhënat dyshohet se eshtrat dhe kafka i përkasin 16-vjeçari Mariglen Gjonaj (Huba) të zhdukur para 6 vitesh në këtë zonë. Ka dyshime se i riu mund të jetë grabitur dhe më pas është vrarë pasi mbante me vete sende me vlerë marramendëse.
Do të jetë analiza e ADN-së ajo që do të verifikojë nëse bëhet fjalë për këtë shtetas apo jo. Prokuroria e Kurbinit aktualisht vijon hetimet. Eshtrat dhe kafka e gjetur, janë dërguar në Institutin e Mjekësisë Ligjore për ekzaminime shkencore.
Në dukje, eshtrat janë të hershme dhe moshë e re, por pritet që ekzaminimet të zbulojnë më tepër detaje.
Historia se si u zhduk adoleshenti:
Mariglen Gjonaj nxënës i klases së 10-të në Gjimnazin e Mamurrasit, u nis në vitin 2015 për në shkollë por nuk u kthye më. Ndryshe nga herët e tjera atë ditë nuk kishte telefon me vete, por kishte me vete në dorë orë Roleks dhe disa bizhuteri që kapnin një vlerë prej 10 milionë lekësh të vjetra. Si çdo ditë ai ka shkuar për të frekuesntuar mësimin por nuk u kthye më kurrë në shtëpi duke u zhdukur së bashku me mjetin e të vëllait. Ishte nëna e tij, ajo që dha e para alarmin duke kërkuar të birin, të cilin fillimisht e kishin kërkuar me të gjithë të afërmit e familjes, më pas ishin dorëzuar duke e denoncuar në Polici. Por adoleshenti nuk u gjet më kurrë.
“Djali kur është larguar ka pasur bizhuteri dhe një orë tepër të shtrenjtë në dorë Roleks të cilat kapnin një vlerë 10 milion lekë të vjetra. Unë dyshoj se djalin ma kanë rrëmbyer për ti marrë bizhuteritë. Kemi shkuar disa herë në polici, por mua më ka humbur besimi tek blutë e Kurbinit, pasi djali ka dy muaj i humbur dhe ne nuk e dimë nëse ai është gjallë apo vdekur,”- shprehej ajo për mediat e kohës. Megjithatë nga ajo ditë do të kalonin dhe 7 vite të tjera e Gjonaj nuk do të gjendej sërish.
