Është gati të nisë në Mynih epoka e re e Julian Nagelsmann, trajnerit surprizë që ka habitur të gjithë me rezultatet e tij pozitive. Trajneri i cili do të largohet nga Leipzig në fund të sezonit, ndërsa klubi i tij do të marrë plot 25 milionë euro si klauzolë për prishjen e kontratës nga Bayern Munich.
Në këtë mënyrë 34-vjeçari, i cili është një nga trajnerët më të ri në qarkullim, do të bëhet kësisoj edhe trajneri më i shtrenjtë në historinë e futbollit. Ndërkaq, duket se Leipzig nga ana tjetër ka nisur tashmë një trend të ri, shitjen e trajnerëve, diçka ende e padëgjuar në masë deri më tani.
Ditën e martë u zyrtarizua gjithçka, teksa sot gazeta gjermane “Bild” ka zbuluar edhe planet e trajnerit për formacionin me të cilin pritet të luajë Bayern Munich. Nga 4-3-3 do kthehet në 3-5-2, që në pamje të parë duket mbrojtës, por do jetë mjaft ofensiv. Nicklas Sule, Lucas Hernandez dhe blerja e re Dayot Upamecano do jenë para Neuer.
Në mesfushë Kimmich dhe Goretzka kanë detyrën për të qenë ekran para mbrojtjes. Alphonso Davies dhe Serge Gnabry do mbulojnë krahët. Më përpara, Muler dhe Sane do mbështesin në majën e sulmit të zakonshmin, Robert Lewandowski.
