Teksa një ditë më parë Policia zbarkoi në shtëpinë e Ervis Martinajt, eksperti i sigurisë Fatjon Softa ka ngritur alarmin.
Softa ka folur mbi çështjen Ervis Martinaj, ku është shprehur se operacioni i policisë duhet të kishte nisur muaj më parë.
Gjatë një lidhjeje të drejtpërdrejtë në “Shqipëria Live”, eksperti tha se nëse dalin lidhjet e Martinajt me persona në radhët e policisë do të ketë furtunë shkarkimesh në Policinë e Shtetit.
“Duket sikur nuk duan ta gjejnë, se nuk kapet një person duke rrethuar banesën në ditë festash. Kontrolli duhet të ishte bërë 8 muaj më parë. Do kishte më shumë mundësi për të gjetur e zbuluar gjë. Dhe nëse dalin ato që ka thënë ai se ka pasur bashkëpunime me policë, do ketë furtunë shkarkimesh në polici,” tha Softa.
Dje, Policia e Shtetit ka ushtruar kontrolle në Fushëkuqe, Vlorë dhe në Shijak, ku janë kërkuar gjurmë e të dhëna që do të mund të hedhin dritë mbi fatin e të shumëkërkuarit të zhdukur pa gjurmë që prej 9 gushtit, Ervis Martinaj. Fushëkuqja e Kurbinit, zona ku dhe jeton familja e Martinajt ishte e rrethuar për pesë orë gjatë ditës së sotme. Por, deri më tani nuk është raportuar për gjetjen e ndonjë të dhëne të re në lidhje me fatin e ish-bossit të lojërave të fatit. Policia e Shtetit doli nga Fushëkuqja me armë e municione luftarakë, por pa ndodnjë gjurmë konkrete që mund të zgjeronte hetimet për 40-vjeçarin e zhdukur.
