Presidenti turk, Rexhep Tajip Erdogan, u ka dërguar një mesazh të ashpër luftëtarëve kurdë në Siri, duke i kërcënuar ata se do të dorëzohen ose do të “varrosen” me ta.
Kjo deklaratë ka ardhur në kuadër të përleshjeve që vazhdojnë midis grupeve militante siriane të mbështetura nga Turqia dhe kurdëve, pas rënies së regjimit të Bashar al-Assad.
Erdogan ka kërkuar shpërbërjen e milicisë kurde YPG, duke argumentuar se ata nuk kanë vend në të ardhmen e Sirisë. Po ashtu, ai ka kritikuar ashpër Assad, duke e quajtur “frikacak” dhe ka theksuar fitoren e popullit sirian që ka shpëtuar vendin nga regjimi i tij.
Në fjalimin e tij, Erdogan ka nënvizuar dhimbjen e popullit sirian gjatë 13 viteve të luftës, duke përmendur viktimat dhe vuajtjet e mëdha që ka shkaktuar ky konflikt.
Ai ka përmendur gjithashtu tragjedinë e fëmijës Ajlan, i cili u mbyt duke u munduar të arratisej, duke e cilësuar atë si një simbol të vuajtjes siriane që e ka lënë gjurmë të thella në kujtesën e botës.
Për Erdogan, fitorja e popullit sirian dhe kyçja e Turqisë në ndërhyrje për të parandaluar më shumë gjakderdhje është një moment i rëndësishëm, ndërsa ai ka shprehur mbështetje për Sirinë e Lirë dhe ka paralajmëruar vazhdimin e operacioneve të Turqisë për të eliminuar grupet që ai i sheh si kërcënim për stabilitetin rajonal.
