Epidemiologu i njohur, Ilir Alimehmeti ka folur në lidhje me situatën e pandemisë së COVID-19 në vendin tonë. Alimehmeti i ftuar në emisionin “Kjo javë” është shprehur se personat e vetëm që duhet ta bëjnë vaksinën edhe pse e kanë kaluar koronavirusin janë të moshuarit dhe të sëmurët rëndë. Ai shprehet se këto dy kategori nuk arrijnë dot të kenë një përgjigje imunitare, ndërsa të rinjtë s’k arsye që të bëjnë vaksinën thotë ai.
Po ashtu Alimehmeti shpjegon se si një person që ka kaluar COVID_19, ka antitrupa të cilët riaktivizohen dhe përgjigjen në momentin kur virusi hyn sërish në organizëm dhe përgjigjja imunitare është e menjëhershme.
“Çfarë dimë ne për një virusi? Kushdo që e ka kaluar çdo virus nuk ka pasur nevojë për vaksinë, apo vaksinimi nuk u ofron më shumë mbrojtje. Nëse ky është i pari në histori dakord, por nuk është i fundit.
Ku është SarsCov-2, që do të thotë se ka pasur SarsCov-1. Personat që e kanë kaluar SarsCov-1, janë ende imunë, kujtoj s’ka pasur vaksinë për atë.
Kalojmë tek SarsCov-2, ju sfidoj të gjeni një vend për statistika për riinfektimet. Ka riinfektime. Të shohim ku ka statistikë për këtë. Studimi më i madh është bërë në mars nga Izraeli, është lider i vaksinimit, ka vetëm një vaksinë. Studioi të gjithë popullatën mbi 16 vjeç. Në rezultatet e tyre, nxori se ngrihe pikëpyetja për vaksinimin e personave të riinfektuar. Tashmë ka dalë një tjetër studim. Përfundimi është, imuniteti natyror zgjat shumë më shumë se vaksinimi.”, është shprehur epidemiologu.
Alimehmeti ka thënë se imuniteti natyror nuk zgjat përgjithmonë, por tek të moshuarit dhe të sëmurët rëndë sipas tij duhet me patjetër të merret vaksina ndërsa përjashtoi nga vaksinimi të rinjtë, sipas tij nuk ka arsye pse ta marrin vaksinën.
“Ne flasim për të dokumentuar, i sigurt. Kjo varet, se kur flasim për mesataren, ka individë që dalin nga mesatarja. Edhe te riinfektimet është e lartë. S’kanë sistemin imunitar të fuqishëm që të arrijnë përgjigje imunitare që zgjat. Janë të moshuarit dhe të sëmurët rëndë, me kancer etj që nuk arrijnë dot të kenë përgjigje imunitare ku duhet. Edhe pse e kanë kaluar, duhet menduar vaksinimi, janë ndoshta të vetmit. Për të rinjtë nuk gjen arsye biologjike. Vaksina të njeh vetëm me spajkun, atë të çan, ndërkohë që një person që e ka kaluar ka njohur virusin. Ka shumë më tepër zona ku e sulmon, imunitati është shumë më i gjerë. Duhet të jemi me këmbë në tokë, nuk e njohim natyrën plotësisht.”, u shpreh Alimehmeti.
Ndër të tjera ai ka thënë se trupi krijon aq antitrupa sa i duhen për të luftuar virusin.
“Numri i antitrupave s’ka vlerë praktike, bëhen për të bërë diagnozën. Bëhet analiza a ishte vërtet SarsCov2. Duke shpjeguar, kur një person ka infeksion të lehtë, ngre një ushtri antitrupash për ti bërë ballë, kur ka infeksion të rëndë, lufta është shumë e madhe. Trupi ngre aq antitrupa sa i duhet. Kur ka pak ushtarë pse duhet të kesh ushtri të madhe. Ky proces, këtyre njerëzve i ka njohur me virusin, pasi ikën virusi bien antitrupat, por ke disa oficerë gati, nëse rihyn armiku i njohur ringrejnë aq ushtri sa i duhet. Po të shihni, ata që janë vaksinuar reagojnë edhe më fort. E njohin, i ngjan me virusin dhe menjëherë reagojnë.”, ka thënë Alimehmeti.
