Në Shqipëri ka nisur vaksinimi kundër sëmundjes COVID-19, ku të parët që do ta marrin këtë shërbim janë punëtorët shëndetësorë, që do pasohen nga policët dhe shërbyesit e tjerë publikë, si dhe të moshuarit apo grupet që konsiderohen më të rrezikuarat.
Kryetari i Komisionit të Shëndetësisë, Enver Roshi, i ka bërë një kërkesë kryeparlamentarit Gramoz Ruçi që deputetët të jenë në listat prioritare për t’u vaksinuar kundër koronavirusit.
Sipas tij, deputetët ekspozohen më shumë ndaj virusit për shkak të takimeve të shumta që kanë me elektoratin.
“Të hartohet një listë për ne, edhe për ata deputetë që nuk e kanë kaluar e për grupe të tjera, që të mos preken deputetët nga Covid-i, që të vaksinohemi, të jemi në grupet prioritare, jo para atyre që janë në frontin e luftës, por në vijën e dytë apo të tretë të përfshihen deputetët për t’u vaksinuar me vaksinën anti-Covid”, tha Enver Roshi.
Por kërkesa e tij është kundërshtuar nga kryeministri Rama, i cili deklaroi se “asnjë deputet, asnjë ministër, asnjë drejtor, që nuk është mbi 75 vjeç, nuk do ta marrë vaksinën më përpara”.
Kujtojmë se deputeti Enver Roshi e kaloi koronavirusin, pasi u dërgua për kurim drejt Turqisë.
Kryeministri Rama deklaroi se qeveria ka arritur të sigurojë nisjen e vaksinimit përpara afatit të deklaruar prej tij, prej faktit se një vend anëtar i Bashkimit Evropian ka arritur t’i sigurojë Shqipërisë vaksina të tjera shtesë, përtej 500 mijë dozave të siguruara me kompaninë amerikane, Pfizer. Megjithatë, kryeministri Rama nuk ka treguar se nga cili shtet i BE-së janë siguruar dozat e vaksinës.
/Gazetareforma.com/
