Mosmarrja e pagave në kohën e duhur ka detyruar dhe minatorët e minierës së “Trepçës” në Stantërg që të hyjnë në grevë duke ndërprerë punën.
Pasi kanë lënë punën disa prej tyre janë vendosur në oborrin e jashtëm të ndërmarrjes ku punojnë në pritje të një përgjigje pozitive nga drejutesit e ndërmarrjes.
Gani Osmani, kryetar i Sindikatës së Punëtorëve të kësaj miniere, konfirmoi për KosovaPress se minatorët janë në grevë, duke bërë të ditur se arsyeja e vetme për ndërprerjen e punës janë pagat. Sipas tij, që nga dita e djeshme ndërrimi i dytë dhe i tretë nuk kanë punuar dhe atyre u është bashkuar edhe ndërrimi i parë, ndërsa tha se kjo gjendje do të vazhdojë derisa të mos zgjidhet ky problem.
“E vetmja arsye pse jemi në grevë janë pagat e muajit tetor. Kemi biseduar me menaxherin i cili na ka thënë se për momentin nuk ka mjete. Nuk dimë kur do t’i marrim pagat, por deri atëherë ne nuk do të punojmë”, tha Osmani.
