Ndryshe nga 2 ditë më parë, kur talebanët premtuan paqe dhe qeverisje të qetë në Afganistan, një zyrtar i tyre, Waheedullah Hashimi, e përjashtoi mundësinë e demokracisë. Në një intervistë për Reuters, ai tha se vendi do të qeveriset nga një këshill taleban dhe se çdo pamje e demokracisë tashmë është përjashtuar.
Hashimi deklaroi se do të ketë një takim të udhëheqjes talebane, ku do të diskutohen çështjet e qeverisjes gjatë kësaj jave. Ai shtoi se talebanët do të ndjekin ligjin e Sheriatit dhe kaq.
“Nuk do të ketë fare sistem demokratik sepse nuk kanë ndonjë bazë në vendin tonë. Ne nuk do të diskutojmë se çfarë lloj sistemi politik duhet të aplikojmë në Afganistan, sepse është e qartë. Është ligji i Sheriatit dhe kaq. Shumica e tyre janë trajnuar në Turqi dhe Gjermani dhe Angli. Kështu që ne do të flasim me ta për t’u kthyer në pozicionet e tyre”, tha fillimisht Waheedullah Hashimi.
“Sigurisht që do të kemi disa ndryshime, të kemi disa reforma në ushtri, por prapë ne kemi nevojë për to dhe do t’i thërrasim që të na bashkohen. Ne kemi kontakte me shumë pilotë. Dhe i kemi kërkuar që të vijnë dhe të bashkohen, t’u bashkohen vëllezërve të tyre, qeverisë së tyre”, përfundoi zyrtari i talebanëve
