Zëvendës ministrja e Shëndetësisë Mira Rakacolli e ftuar në emisionin “Provokacija” tha se strukturat spitalore kanë 300 respiratorë, por po përdoren vetëm dy pasi gjendja e pacientëve është e stabilizuar.
“Njerëzit nuk duhet të përqafohen akoma. Virusi do na ndryshojë mënyrën e jetesës. Conte tashmë po hetohet që mbyllet vonë. Ne u mbyllëm herët, ky ishte suksesi. Sot jemi më të përgatitur se në janar. Kemi më shumë dijeni, eksperiencë dhe siguri.
Ne kishim rreth 200 respiratorë dhe nuk i kemi përdorur. Kemi blerë rreth 100 të tjerë. Sot përdoren vetëm dy”,tha Rakacolli.
Së fundmi në spitalin COVID-1 janë shtuar 30 respiratorë të rinj, si një parapërgatitje për skenarët ekstrem që mund të ndodhin pas rritjeve të rasteve me të infektuar, lajm ky nga ministrja e Shëndetësisë Ogerta Manastirliu.
Rakacolli u shpreh se deri më tani numrat janë nën kontroll, por shtoi se nëse njerëzit nuk ndjekin rregullat, karantinimi do të vijë nga sëmundja.
“Nëse njerëzit nuk i ndjekin rregullat do karantinohemi nga sëmundja. Do jetë karantinim pa detyrim. Unë them se numrat hë për hë janë të kontrolluara. Jemi akoma në kohë që po i zbatuam udhëzimet si kemi thënë, besoj se do jemi si ishim përpara, do bëjmë plazh, do vazhdojmë turizmin.
Efekti i masave do duken pas një jave, nëse do vazhdojmë korrigjimin nga sot. Virusi ka një kohë inkubacioni që maksimalisht shkon dy javë.
Kryeministri është shumë i kujdesshëm dhe ka kërkuar vazhdimisht mendim të ekspertëve dhe është konsultuar dhe me profesionistë.
Duhet të vazhdojmë të bashkëpunojmë ashtu si ishim në fillim. Po të vazhdojmë të bashkëpunojmë në këtë moment patjetër që do ia dalim”.
