Pas zjarrit masiv që përfshiu një treg ambulant pranë plazhit në Durrës, policia ka proceduar penalisht në gjendje të lirë pronarin e tregut, nën akuzën për shkelje të rregullave të mbrojtjes në punë.
Flakët, që shpërthyen një ditë më parë, përfshinë një sipërfaqe të konsiderueshme dhe shkaktuan ndërprerje të qarkullimit në rrugën “Pavarësia”.
Tregu i përbërë nga struktura me llamarina përmbante mbi 20 njësi tregtare, të cilat funksionojnë kryesisht gjatë sezonit veror.
Prefekti i qarkut Durrës, Emilian Jani, konfirmoi se dëmet materiale janë të shumta, ndërsa theksoi se tregu nuk plotësonte asnjë standard sigurie teknike.
“Zjarri ishte masiv, u përfshinë në operacion të gjitha njësitë zjarrfikëse nga Durrësi, Autoriteti Portual, bashkitë e Shijakut dhe Kavajës, si dhe nga Kamza. Furnizimi me ujë u bë me mbështetje nga të gjitha institucionet vendore,” deklaroi Jani.
Ai shtoi se ende nuk ka një shkak zyrtar për zjarrin, por dyshohet për një defekt në sistemin elektrik.
“Ky treg është i menaxhuar nga një subjekt privat dhe nuk përmbush asnjë kriter sigurie. Për këtë arsye, përhapja e flakëve ishte e shpejtë dhe e pakontrollueshme. Fatmirësisht, nuk pati viktima apo të lënduar,” përfundoi prefekti.
