Vatrat e zjarreve në malin e Tërbunit në qytetin e Pukës, po vijojnë të përhapen me shpejtësi të madhe, të ndihmuara dhe nga prania e erërave të forta në këtë zonë. Drejtori i shërbimit pyjor në Bashkinë e Pukës, Astrit Hyseni, tha se shpreson që gjatë ditës së sotme, të neutralizohen të gjitha vatrat, falë ndërhyrjes nga toka e ajri.
Hyseni i bëri apel qytetarëve të Pukësqë të tregojnë kujdes kur frekuentojnë këto zona, pasi dyshohet se zjarret janë të qëllimshme e jo të shkaktuara në mënyrë natyrale. “Sapo jemi vendosur në dijeni për zjarret kemi ardhur në terren. Na u kërkua ndërhyrje nga ajri, jemi munduar me të gjitha mundësitë të vendosim zjarret në kontroll”, tha fillimisht Hyseni.
Më pas, drejtori i shërbimit pyjor në Pukë, u shpreh: “Besojmë që brenda ditës, do të arrijmë t’i neutralizojmë këto vatra zjarri, falë edhe mbështetjes që kemi marrë nga ajri. I bëj thirrje publike të gjitha banorëve, të kenë kujdes në këto masive pyjore, pasi mund të bëhen shkak nga një mjet rrethanor për vendosjen e zjarreve në këto masive. Kjo është pasuri kombëtare. Këto pyje janë të trashëguara dhe të ruajtura”, tha mes të tjerash drejtori i shërbimit pyjor, Astrit Hyseni.
