Vatra e zjarrit në zonën e Pilurit, në bashkinë e Himarës, vijon të jetë aktive edhe pas disa ditësh përpjekjesh për shuarjen e saj.
Flakët kanë shkrumbuar deri më tani rreth 650 hektarë sipërfaqe me kullota dhe bimësi të ndryshme.
Sipas përgjegjësit të emergjencave civile pranë Prefekturës së Vlorës, Robert Skendaj, ndërhyrja ka vijuar pa ndërprerje si nga toka, ashtu edhe nga ajri.
Në operacion janë përfshirë forcat zjarrfikëse nga bashkitë Vlorë, Sarandë, Himarë dhe Finiq. Ndihmë të rëndësishme kanë dhënë edhe Forcat e Armatosura, me rreth 40 efektivë që janë angazhuar në terren dhe nga ajri, përmes përdorimit të helikopterëve.
Autoritetet po vijojnë punën për vënien nën kontroll të flakëve, ndërsa vlerësimi i dëmeve materiale vazhdon.
