Ditën e sotme kanë mbërritur në aeroportin e Rinasit 3 helikopterë që do të ndihmojnë për shuarjen e flakëve në vend, dy nga Holanda e një nga Çekia.
Kjo si pjesë e mbështetjes së dy vendeve, në kuadër të aktivizimit të Mekanizmit të Mbrojtjes Civile të Bashkimit Evropian, për shuarjen e zjarreve në territorin e Shqipërisë.
Zv.ministrja e Mbrojtjes, Dallëndyshe Bici dhe Drejtori i Agjencisë së Mbrojtjes Civile Haki Çako i pritën mjetet në aeroport në prani përfaqësues të ambasadave përkatëse dhe Shefit politik të delegacionit të BE-së në Tiranë, Alexis Hupin.
Bici falenderoi në emër të qeverisë dy vendet për ndihmën e ofruar dhe njoftoi se helikopterët do të nisin punën nesër në mëngjes herët.nga ana tjetër, Çako shprehu mirënjohje për reagimin e shpejtë të Mekanizmit të Mbrojtjes Civile Evropiane. Ai vuri në dukje situatën e rëndë në Karaburun, në kufi me Parkun Kombëtar të Llogarasë.
Shefi politik i delegacionit të BE, Alexis Hupin tha se ndihma është një shenjë e solidaritetit europian dhe shtoi se BE do t’i qëndrojë në krah shqipërisë.
“Kjo është një shprehje e solidaritet të Bashkimit Evropian dhe duam t’i qëndrojmë në krah të Shqipërisë në këto momente. Jemi këtu për të mbrojtur jetët e njerëzve që po preken nga këto zjarre dhe gjithashtu bukuritë e natyrës shqiptare. Nesër fillon puna me helikopterin”,tha Hupin.
Kujtojmë që Bashkimi Europian aktivizoi Mekanizmin e Mbrojtjes Civile për t’i ofruar ndihmë disa prej shteteve që po kalojnë një situatë të vështirë nga zjarret si Greqia, Maqedonia e Veriut, Italia edhe Shqipëria.
