Një zjarr ka rënë mëngjesin e sotëm në kabinën elektrike të një pallati 4-katësh në lagjen “18 Shtatori” të qytetit të Gjirokastrës, duke shkaktuar shqetësim mes banorëve.
Flakët përfshinë kabinën në katin përdhes, por fatmirësisht katastrofa u shmang, falë ndërhyrjes së shpejtë të zjarrfikësve.
Banorët kanë lajmëruar menjëherë autoritetet, ndërsa ekipet e zjarrfikëses mbërritën në kohë rekord, të pajisura me mjetet përkatëse, duke bërë të mundur neutralizimin e flakëve, të cilat po përhapeshin me shpejtësi.
Nuk raportohet për të lënduar, ndërsa falë ndërhyrjes efikase u parandalua edhe dëmtimi i apartamenteve dhe objekteve të tjera.
Shkaku paraprak i zjarrit dyshohet të jetë mbingarkesa e rrjetit elektrik, çka ka çuar në mbinxehje dhe më pas në ndezjen e kabinës.
Banorët janë jashtë rrezikut, ndërsa autoritetet kanë nisur hetimet për të përcaktuar me saktësi shkaqet dhe për të kontrolluar gjendjen teknike të instalimeve elektrike në ndërtesë.
