Nga data 5 deri më 8 qershor 2025, Tirana do të mirëpresë edicionin e parë të Festivalit Ndërkombëtar të Arkitekturës “Bread & Heart Festival”, një ngjarje që bashkon mikpritjen tradicionale shqiptare me dialogun modern mbi arkitekturën dhe të ardhmen e qyteteve.
Për garantimin e sigurisë dhe mbarëvajtjes së festivalit, Policia e Tiranës ka shpallur një plan të posaçëm masash, i cili parashikon kufizime të lëvizjes në disa nga rrugët kryesore të kryeqytetit.
Nga ora 22:00 e datës 5 qershor deri në 23:30 të datës 6 qershor do të ndalohet qarkullimi në këto akse:
• Segmenti nga Ura e Dajtit deri te kryqëzimi i Ministrisë së Brendshme me Bashkinë e Tiranës;
• Rruga “Myslym Shyri”;
• Rruga “Ibrahim Rugova”;
• Bulevardi “Dëshmorët e Kombit”, nga rruga “Abdi Toptani” deri te rruga “George W. Bush”;
• Po ashtu do të ndalohen vendqëndrimet e autobusëve në rrugën “28 Nëntori”, pas godinës së Teatrit të Operës dhe Baletit.
Ngjarja qendrore e festivalit zhvillohet në ndërtesën “Book Building”, një hapësirë moderne pranë sheshit “Skënderbej”, e cila do të shërbejë si skenë për ekspozita, sesione diskutimi dhe performanca artistike.
Dita e hapur e festivalit do të mbahet më 6 qershor, nga ora 08:00 deri në 23:55, me një program të ndarë në katër sesione kryesore.
Tema e këtij edicioni është“Bukë dhe zemër / Sillni pak kripë ju lutem”, mishëron frymën shqiptare të mikpritjes dhe fton për një dialog të sinqertë mes arkitektëve vendas dhe ndërkombëtarë.
Më shumë se 150 grupe arkitektësh nga mbarë bota do të marrin pjesë në këtë festival, ku do të prezantojnë projektet e tyre, shumë prej të cilëve janë të lidhura me zhvillime konkrete në Shqipëri.
Organizatorët inkurajojnë pjesëmarrësit që të sjellin me vete një mik të ri, si një simbolikë e afërsisë njerëzore në shërbim të ndërtimit të së ardhmes.
Ky festival, organizuar nga Agjencia e Zhvillimit të Territorit, shënon një ngjarje të veçantë për skenën kulturore dhe urbane të Shqipërisë, duke e vendosur Tiranën në hartën e kryeqyteteve që mikpresin mendimin bashkëkohor arkitektonik dhe urbanistik.
