Aktivistë dhe qytetarë të Kosovës kanë protestuar ditën e sotme pranë ndërtesës së qeverisë, kundër taksës shesë për regjistrimin e makinës që hyn në fuqi nga 1 shtatori. Ata kanë mbushur makinat me mbishkrimin “zhvatës” dhe kanë ngjitur “sticker-a”, ndërsa policia ka reaguar pa humbur kohë.
Policia ka ushtruar dhunë dhe ka arrestuar aktivistët e Partisë Social-Demokrate, ndër to edhe kryetari Dardan Molliqaj. Në një reagim PSD thotë se policia përdori brutalisht dhunë me urdhër të Kurtit, ndaj kujtdo që e kundërshton atë.
“Gjatë aksionit të sotëm për të shfaqur zhvatjen që pushteti i Kurtit po e bën ndaj qytetarëve, duke taksuar shtesë regjistrimin e makinës e duke krijuar monopol për një kompani, policia ndërhyri dhunshëm për ta ndërprerë aksionin duke arrestuar e lënduar brutalisht aktiviste e aktivistë të PSD-së.
Policia, nën urdhërat e Kurtit, me përdorim brutal të dhunës po dëshiron të shtyp këdo që kundërshton atë. Zhvatja ndaj qytetarëve nuk guxon të kaloj heshtur e nën kërcënimin e dhunshëm e brutal të pushtetit.
Kërkojmë urgjentisht që aktivistet e aktivistët Dardan Molliqaj, Teutë Rrusta, Nol Nushi, Zgjim Hyseni, Qëndrim Sahiti, Frashër Krasniqi, Ali Krasniqi dhe Korab Korça të lirohen menjëherë nga arrestimi i padrejtë”, thuhet në reagim.
Taksa e re për makinat nënkupton se qytetarët që posedojnë një automjet, duke filluar që nga 1 shtatori duhet të paguajnë 5 euro shtesëpër të marrë pullën ngjitëse që vërteton se automjeti ka kryer kontrollin teknik.
