Sherif Mukaj, 28-vjeç nga Kolonja është raportuar i humbur.
Fati i 28-vjeçarit ende nuk dihet, ndërsa kontaktet me familjen i ka humbur që prej datës 1 nëntor, kur kishte pasur dhe telefonatën e fundit me prindërit që ndodheshin në Shtetet e Bashkuara të Amerikës.
Rreth 24 ditë pas zhdukjes së mistershme, Policia e Korçës ende nuk ka një përgjigje për fatin e 28-vjeçarit.
Humbja e kontakteve pa gjurmë nga i biri, e detyroi babin e tij të kthehet nga Shtetet e Bashkuara të Amerikës për në Shqipëri.
I ati i Sherif Mukaj tregon për Syri.tv se në telefonatën e fundit nuk vuri re ndonjë gjë të dyshimtë dhe gjendja e tij dukej normale. Ai shton se mendon se atë e kanë marrë nga shtëpia. Gjithashtu në lidhje me dyshimet e tjera ai thotë se nuk ka një ide të qartë pasi nuk ka jetuar në Shqipëri dhe nuk i di rrethanat aq mirë.
Ndërkohë i tronditur, babai i Sherifit tregon se Policia e Shtetit po neglizhon kërkimet e të birit. Ndërkohë, sipas tij, po refuzohet hapja e tabulateve telefonike, për të mësuar kontaktet e fundit të Sherifit, të cilat mund të hedhin dritë mbi zhdukjen e mistershme të djalit.
Ndërsa të afërm të familjes Mukaj shprehen të tronditur nga largimi pa gjurmë i të riut, ndërsa e përshkruajnë atë si djalë shembullor.
