Statuja e ikonës së muzikës rock dhe soul, Tina Turner, është zhdukur për herë të dytë nga kompleksi i artit urban në shëtitoren Taulantia të Durrësit.
Ngjarja dyshohet të ketë ndodhur gjatë natës, ndërsa qytetarët e konstatuan mëngjesin e sotëm mungesën e saj pranë figurave të tjera të famshme të muzikës, si John Lennon, Bob Dylan dhe Jim Morrison.
E njohur si “Mbretëresha e Rock ‘n’ Roll-it”, Tina Turner la pas një trashëgimi muzikore të pasur me hite të paharrueshme si Simply the Best, What’s Love Got to Do with It dhe Proud Mary.
Kjo nuk është hera e parë që statuja e saj zhduket nga shëtitorja. Në vitin 2022, ajo u dëmtua pasi një fëmijë u var te krahët e saj, duke e bërë statujën të rrëzohej dhe të thyhej, duke mbetur vetëm këmbët.
Pas disa muajsh, u riparua dhe u rikthye në vendin e saj, ku u bë një atraksion për banorët dhe turistët.
Ende nuk dihet kush mund të jetë përgjegjës për zhdukjen e saj këtë herë. Policia pritet të nisë hetimet për zbardhjen e ngjarjes.
