Cameron Twiss, një 28-vjeçar australian, u zhduk më 13 tetor teksa po udhëtonte nga Valbona drejt Thethit. Ai u nis për shtegun e njohur, por nuk mbërriti kurrë në destinacion. Vëllai i tij, Stuart Twiss, në një intervistë për Top Channel, bën thirrje për ndihmë nga autoritetet dhe publiku për të gjetur vëllain e tij.
Sipas Stuart, Cameron fillimisht vizitoi Shkodrën, pastaj Malin e Zi, dhe më pas u kthye për të eksploruar Alpet shqiptare. “Cameron pëlqente eksplorimin e pavarur dhe ishte i kënaqur me pushimet e tij në Shqipëri,” shprehet ai. Megjithatë, pas ndarjes nga dy shoqëruesit e tij në kryqëzimin për Jezercë dhe Theth, ai humbi çdo kontakt.
I fundit që e pa australianin ishte Bledar Jubani, i cili e takoi në kryqëzimin e shtegut Jezercë-Theth. Banorët e zonës paralajmërojnë se Alpet shqiptare janë të paparashikueshme dhe kërkojnë kujdes të veçantë për shkak të terrenit të ashpër dhe kafshëve të egra.
Për fat të keq, Cameron nuk është rasti i vetëm: gjatë këtij sezoni turistik, edhe dy turistë të tjerë, një belg dhe një lituanez, janë zhdukur pa gjurmë në të njëjtën zonë. Familja e Twiss kërkon ndihmën e çdo personi që mund të ketë informacion, duke i bërë thirrje autoriteteve për më shumë përpjekje në kërkimet.
