TIRANË
Ka marrë fund ankthi, pritja dhe orët e gjata të shqiptarëve në pikën doganore të Kakavijës.
Pasi kanë pritur me orë dhe ditë të tëra në radhë, shqiptarët më në fund kanë kaluar në tokën greke, për t’u kthyer në punët e tyre në Greqi.
Në lidhje me zhbllokimin e trafikut në Kakavijë, ka reaguar edhe kryeministri Edi Rama. Ky i fundit shprehet se gjen rastin të falënderoj të gjithë ata, që dhanë kontribut në zgjidhjen e ngërçit.
“FALEMINDERIT të gjithë atyre që kontribuan për zgjidhjen e ngërçit të rëndë në pikën kufitare të Kakavisë; qytetarëve në radhë të parë, që në shumicën dërrmuese patën mirëkuptim e durim megjithë hallin e madh; Emergjencave Civile, forcave të ushtrisë e të policisë, trupës së Urgjencës Shëndetësore dhe strukturave vendore, që u gjendën pranë njerëzve me përkushtim e pa orar; të gjithë atyre në vendin fqinj që u përfshinë pa rezervë në përpjekjen për ta lehtësuar situatën, në kushtet kur regjimi i ri kufitar e bënte punën për zgjidhjen e saj tejet të vështirë🇦🇱🤝🇬🇷
U uroj nga zemra një qetësim sa më të shpejtë dhe rifillim normal të jetës së përditshme, të gjithë bashkëqytetarëve që e hoqën atë siklet të madh dhe u lutem të tjerëve në vijim, të ndjekin me vëmendje kriteret e përcaktuara në shtetin fqinj për kalimin e kufirit, e të mos nisen pa u siguruar se mund ta kalojnë kufirin pa siklete të ngjashme🙏
Rrugë të mbarë udhëtarëve të fundit dhe ruani veten e të tjerët nga virusi i rrezikshëm Covid19❤️”, shkruan Rama.
Kujtojmë se situata në Kakavijë, tejkaloi çdo lloj normaliteti, me një radhë të automjeteve që shkoi deri në 12 kilometër.
Në këtë kaos, ndodhi edhe një aksident tragjik, teksa ambulanca përplasi për vdekje një fëmijë 10 vjeç, ndërsa për gjendjen atje reaguan edhe autoritetet më të larta të Shqipërisë.
