Pas deklaratës së Presidentit Meta paraditen e sotme lidhur me çështjen e zgjerimit të Greqisë 12 milje në detin Jon, ku presidenti deklaroi se nuk ka asnjë njoftim zytar lidhur me procesin e negociatave dypalëshe, ka reaguar edhe kryeministri Rama.
Në përgjigjen e tij, me anë të një postimi në rrjetin social twitter, Rama shkruan se Shqipëria dhe Greqia nuk kanë arritur asnjë marrëveshje dhe pikërisht për këtë arsye do të shkojnë në gjyq ndërkombëtar.
Kreu i ekzekutivit, përsëriti sërish se nuk bëhet fjalë për zgjerimin me 12 milje, pasi kjo është e trajtuar qartë në Konventën Ndërkombëtare, por bëhet fjalë për kufirin e hapësirës ndërkombëtare.
“Shqipëria dhe Greqia nuk kanë arritur asnjë marrëveshje e prandaj do shkojnë në gjyq! Vendimi në fjalë i Greqisë s’ka lidhje me zonën e kontestuar mes dy vendeve tona, sepse në atë zonë parimi i 12 miljeve është thjesht fizikisht i pamundur sipas Konventës aty ku ky parim nuk është e mundur të zbatohet, ose bëhet marrëveshje ose shkohet në gjykatë! Ja kështu Like!”, ka shkruar kryeministri Rama.
Postimi i plotë:
Ilir Meta mirëkuptuaka ndjeshmërinë e qytetarëve mbi vendimin e autoriteteve greke për të ushtruar të Drejtën Ndërkombëtare të Detit për Greqinë dhe pasojat e mundshme që mund të paskërka ky vendim për vendin tonë!
Në fakt jo, Ilir Meta vazhdon kërkon shesh për përsheshin e LSI!
Vetëm të paudhët si Saliu e si Iliri dhe ndjekësit e tyre me Lulin e me Monikën në krye, mund të kërkojnë shesh për përshesh deri në det, ndërkohë që e vërteta është e qartë si drita e diellit: Shqipëria dhe Greqia nuk kanë arritur asnjë marrëveshje e prandaj do shkojnë në gjyq!
Vendimi në fjalë i Greqisë s’ka lidhje me zonën e kontestuar mes dy vendeve tona, sepse në atë zonë parimi i 12 miljeve është thjesht fizikisht i pamundur sipas Konventës aty ku ky parim nuk është e mundur të zbatohet, ose bëhet marrëveshje ose shkohet në gjykatë! Ja kështu Like!
Kujtojmë se vetëm disa ditë më parë, Greqia njoftoi zyrtarisht se do të zbatonte dekretin për tu zgjeruar me 12 milje në detin Jon.
Ky lajmi hapi një debat të nxehtë në politikën shqiptare.
Partia Demokratike akuzoi kryeministrin Rama se qeveria po shet detin, ndërsa i dërgoi zyrtarisht edhe 6 pyetje në lidhje me këtë çështje, duke i kërkuar transparencë.
Rama ndërkohë iu kundërpërgjigj shkurt Partisë Demokratike, se është një marrëzi e madhe akuza për shitjen e detit, ndërsa shtoi se Greqia ka zbatuar të drejtën e saj bazuar në konventë ndërkombëtare për t’u zgjeruar në detin Jon.
Ndërkohë ditën e sotme, presidenti Meta, u shpreh se nisur nga shqetësimet e qytetarëve ka kërkuar informacion lidhur me diskutimet mes dy vendeve për çështjen e zgjerimit të palës greke 12 milje në detin Jon./Gazetareforma.com/
