Votimi për zgjedhjen e kryetarit të ri të Partisë Demokratike në Bulqizë është shoqëruar me tensione të shumta.
Midis mbështetësve të kandidatëve Fatos Hoxha dhe Shaqir Manjani ka pasur përplasje të forta që janë shfaqur edhe në veprime të dhunshme.
Një derë është shkulur nga vendi nga anëtarët e PD-së teksa ka pasur debate verbale dhe shtyrje për të hyrë në vendin e votimit.
Kujtojmë që ky proces zgjedhjesh u shty të dielën për shkak të pretendimeve për fryrje të listës së anëtarëve që do të votonin për zgjedhjen e kryetarit të ri të degës. Zgjedhje që ishin planifikuar për tu zhvilluar në Bulqizë, janë anuluar duke bërë që procesi i votimit të ndërpritet. Kjo ndërprerje ka ardhur si shkak i mosgjetjes së një konsensusi të përbashkët mes kandidatëve, pasi kandidatët Dëfrim Fiku dhe Fatos Hoxha pretendojnë se listat origjinale të anëtarëve me të drejtë vote janë ndryshuar.
Ata thonë se lista origjinale me 1,700 persona me të drejtë vote, është ndyshuar duke shtuar të paktën 500 anëtarë të rinj. Sipas tyre aktualisht lista ka mbi 2,200 anëtarë me të drejtë vote. Të dielën ishin tre kandidat në garë, ish- Kryetari Defrim Fiku, Fatos Hoxha dhe Shaqir Manjani.
Por një ditë më pas ish- kryetari Defrim Fiku u tërhoq nga gara duke lënë të garojnë për këtë post mjekun Fatos Hoxha dhe avokatin Shaqir Manjani.
Vlen të përmendim se Bulqiza është e fundit që po i nënshtrohet procesit të ristrukturimit të nisur nga komisioni i rithemelimit të PD. Në Dibër është zgjedhur kryetar i degës Ilir Krosi dhe në Mat, Denisa Vata.
