Presidentja në detyrë e Kosovës, Vjosa Osmani, ka bërë të ditur se sllogani i listës me të cilën do të kandidojë në zgjedhjet e përgjithshme në vend është ‘GUXO’.
E para e Kosovës e ka njoftuar slloganin e listës së saj përmes ‘Facebook’-ut, e cila ka ngarkuar edhe një fotografi të logos së listës.
“Të guxosh është rezistencë kundrejt një situate kur pashpresa dominon optimizmin, kur frika krijon hapësirë, kur reagimi merr fund.
Vjen një moment dhe një kohë kur nevoja për transformim kërkon veprim. Andaj GUXO!
Guximi për sot është ndryshimi për nesër!”, ka shkruar Ushtruesja e Detyrës së Presidentes së Republikës së Kosovës, Vjosa Osmani.
Kujtojmë se Vjosa Osmani mori detyrën si ushtruese e detyrës së presidents, pasi ish-presidenti Hashim Thaçi dha dorëheqjen nga posti i tij sepse iu konfirmua aktakuza për krime lufte në Hagë, nga Gjykata Speciale.
Vjosa Osmani u bë ushtruese e detyrës së Presidentes së Republikës pasi Kushtetuta e Kosovës e parashikonte që Kryetari/rja e Kuvendit, në raste të veçanta, e zëvendëson përkohësisht deri në 6-muaj postin e Presidentit në rast se Presidenti/ja i mëparshëm e lë përgjysëm mandatin e tij/saj.
Osmani deklaroi gjatë betimit në Kuvend për posten e Presidentes, se në këtë periudhë të vështirë për vendin duhet një lidership i fuqishëm dhe përgjigje e unifikuar shtetërore. Ajo u zotua para qytetarëve se do të ushtrojë detyrën e kryetares së shtetit duke promovuar këto vlera./Gazetareforma.com/
