Komisioni Qendror i Zgjedhjeve (KQZ) ka publikuar raportin mbi shpërndarjen e mandateve parlamentare sipas qarqeve, bazuar në numrin e popullsisë.
Sipas këtij raporti, Tirana do të fitojë një mandat të ri, duke arritur në 37 mandate, ndërsa Korça humbet një mandat, duke zbritur në 10.
“Referuar kritereve të përcaktuara në nenin 75 të Kodit Zgjedhor dhe të dhënave nga Drejtoria e Përgjithshme e Gjendjes Civile, numri total i shtetasve (4,627,824) është pjesëtuar me 140 mandate, duke rezultuar në një mesatare prej 33,056 shtetas për çdo mandat. Më pas, çdo qark ka marrë numrin e mandateve në bazë të popullsisë dhe mbetjes më të madhe pas presjes,” shpjegon KQZ në relacion.
Për të plotësuar numrin total prej 140 mandatesh, shtatë mandate shtesë u shpërndanë qarqeve me mbetjen më të madhe pas llogaritjes, sipas parashikimeve të Kodit Zgjedhor.
