Kjo e hënë ka nisur me një mbledhje në ambientet e kryesisë së PS-së.
Kryeministri Edi Rama po zhvillon një takim me drejtuesit e qarqeve lidhur me zgjedhjet e 25 prillit. Në qendër të bisedimeve është pikërisht menaxhimi i fushatës elektorale si dhe detyrat që do ketë secili drejtues qarku. Mbledhja në fjalë nisi në orën 08:30, e cila duhet thënë se është mbledhja e parë me drejtuesit e 12 qarqeve në selinë rozë, për vitin 2021.
Ndër të tjera, drejtuesit politikë do të raportojnë për realizimin e detyrave të lëna në mbledhjen e fundit. Gjithashtu do të ketë diskutime edhe për mesazhet politike që do të përcillen në vijim, si dhe pritet të diskutohet edhe për emrat e kandidatëve socialistë që do të garojnë për PS-në më 25 prill.
Tre ditë më parë, ambasadorja e Shteteve të Bashkuara të Amerikës në Tiranë, Yuri Kim, reagoi sërish me një mesazh të fortë kundrejt partive politike në vend. Kim shpërndau një postim të bërë disa muaj më parë ku shkruante:
“Paralajmërim: Ndërsa partitë përgatiten për zgjedhjet, udhëheqësit do të mbajnë përgjegjësi për ata që garojnë nën flamurin e tyre. Ju lutemi kontrolloni kandidatët tuaj – mos fyeni votuesit, mos minoni demokracinë, mos promovoni korrupsionin”.
Ndërkohë këtë deklaratë të saj Yuri Kim e përforcoi duke shtuar se ky paralajmërim mbetet në fuqi. Ajo solli si shembull Tony Blinken-in, i nominuari i Presidentit Biden për Sekretar i Shtetit, i cili tha në seancën e tij 1/19 para Senatit: “Ne duam të lartësojmë punën në luftimin e korrupsionit”.
“Nëse doni të dini nëse ky paralajmërim mbetet i vlefshëm, kjo është ajo që Tony Blinken, i nominuari i Pres Biden për Sekretar i Shtetit, tha në seancën e tij 1/19 para Senatit: “Ne duam të lartësojmë punën në luftimin e korrupsionit”, shkroi më tej Yuri Kim.
