Nga qyteti i Korçës, ambasadori i Bashkimit Europian në Shqipëri, Silvio Gonzato, ka bërë thirrje për miratimin e një reforme gjithëpërfshirëse zgjedhore, duke e konsideruar këtë si një hap të domosdoshëm në rrugën drejt integrimit europian.
Gonzato theksoi se tashmë është momenti që Parlamenti shqiptar të veprojë konkretisht, duke reflektuar mbi rekomandimet e vjetra dhe të reja të OSBE/ODIHR.
Në deklaratën e tij, ai iu referua edhe zgjedhjeve të 11 majit, për të cilat u shpreh se janë administruar në mënyrë pozitive, veçanërisht për rolin e Komisionit Qendror të Zgjedhjeve dhe bashkëpunimin e tij me Prokurorinë e Përgjithshme dhe SPAK-un.
“Edhe pse raporti përfundimtar i OSBE-së ende nuk ka dalë, vlerësimi nga Brukseli ka qenë i qartë. Standardet janë respektuar në shumë drejtime, megjithatë ka ende çështje që duhen adresuar, si përdorimi i burimeve publike gjatë fushatës,” u shpreh Gonzato.
Ai theksoi se qeveria, duke qenë në zotërim të shumicës parlamentare, ka përgjegjësinë për të udhëhequr këtë reformë.
“Çdo parti që ndjen se është dëmtuar në zgjedhje, duhet t’i drejtohet institucioneve të drejtësisë. Por përtej polemikave, është jetike që partitë kryesore të bashkëpunojnë për të përmbushur pritshmëritë e qytetarëve dhe për të ecur realisht drejt Bashkimit Europian,” përfundoi ambasadori Gonzato.
