Nënkryetari i Partisë së Rithemelimit, Oerd Bylykbashi, gjatë një konference për shtyp, ka bërë prezantimin e qëndrimit zyrtar të partisë mbi reformën zgjedhore, duke theksuar sfidat dhe problematikat e zgjedhjeve në Shqipëri në dhjetë vitet e fundit. Bylykbashi përdori “librin e zi” të hartuar nga opozita si bazë për të ilustruar atë që ai quajti “farsën elektorale” të zgjedhjeve të 14 majit.
“Libri i zi i zgjedhjeve 2023, i konfirmuar nga toni kritik i raportit përfundimtar të OSBE/ODIHR, na paraqet një panoramë të qartë të abuzimeve zgjedhore dhe problematikave si shitblerja e votës dhe përdorimi i të dhënave nga sistemi i patronazhimit,” deklaroi Bylykbashi. Ai shtoi se këto probleme duhet trajtuar nëpërmjet reformave të thella zgjedhore.
Një nga propozimet kryesore të Bylykbashit është rikthimi te Marrëveshja e 5 Qershorit të vitit 2020, e cila, sipas tij, trajton në mënyrë efikase çështjet zgjedhore dhe ka marrë mbështetje të gjerë ndërkombëtare. “Marrëveshja e 5 Qershorit u përshëndet jo vetëm nga ambasadorët, por edhe nga kancelaritë diplomatike në Uashington, Bruksel dhe Berlin. Është një bazë e fortë për të ecur përpara,” theksoi ai.
Gjithashtu, Bylykbashi kërkon rikthimin e koalicioneve si në vitin 2020, me listat e hapura për partitë brenda koalicioneve, duke argumentuar se ky model ka garantuar rotacionin politik dhe ka reduktuar pabarazinë e votave. Ai përmendi rastin e Lëvizjes Socialiste për Integrim, e cila mori 108 mijë vota dhe vetëm katër mandate, krahasuar me Partinë Social Demokrate e Tom Doshit që me 30 mijë vota siguroi tre mandate.
“Kërkojmë një reformë zgjedhore që përfshin rregullime të reja penale për të trajtuar abuzimet zgjedhore dhe për të rritur ndëshkimet për shkeljet, për të garantuar një proces zgjedhor më të drejtë dhe më transparent,” shtoi ai. Bylykbashi pohoi se partia e tij është e përkushtuar për të kontribuar në realizimin e votës së diasporës dhe për të adresuar sfidat e votimit elektronik, të cilat kanë shfaqur probleme në zgjedhjet e fundit.
