Kryetari i Partisë Demokratike, Lulzim Basha ka reaguar në lidhje me zgjedhjen e kreut të ri të Autoritetit të Mediave Audiovizive. Në një psotim në Twitter Basha shkruan se kreu i ri u zgjodh në kundërshtim me thirrjet e BE dhe OSBE për ta shtyrë në shtator votimin.
Basha thotë se kjo nuk është forcë, por harbutëri në dëm të shqiptarëve dhe Shqipërisë. Ai shprehet se Rama ia hedh fajin Europës, për të fshehur dështimin e tij.
Reagimi i plotë:
“E ka fajin Europa” llomotit poshtë e lart, për të fshehur dështimin e tij dhe pengimin e Shqipërisë.
Por sapo i jepet një shans për të vepruar në shërbim të interesave të vendit, sikurse kërkuan BE dhe OSBE, zgjedh të bëjë të kundërtën,duke hedhur poshtë thirrjen e partnerëve për të shtyrë në shtator votimin për AMA.
Kjo nuk është forcë, po harbutëri në dëm të të gjithë shqiptarëve dhe të Shqipërisë”.
Kuvendi zgjodhi sot kreun e ri të AMA-së, duke votuar me 83 vota pro Armela Krasniqin, kundrejt vetëm 9 votave të Alket Dibrës. Delegacioni i BE dhe OSBE kishin rekomanduar që zgjedhjet të shtyheshin për në shtator kur të formohet dhe legjislatura e re.
BE argumentonte se nuk duhet të ketë dyshime mbi natyrën jopartiake dhe pluraliste të AMA-s.
