Presidenti i Ukrainës, Volodymyr Zelensky, bëri të ditur se ka zhvilluar një bisedë telefonike me presidentin amerikan Donald Trump, ku fokusi kryesor ishte forcimi i mbrojtjes ajrore të Ukrainës, në sfondin e sulmeve të intensifikuara nga Rusia në qytete të ndryshme ukrainase.
Përmes një postimi në Telegram, Zelensky theksoi se Trump ishte “shumë mirë i informuar” mbi situatën në terren dhe se të dy palët diskutuan mundësitë konkrete për përmirësimin e kapaciteteve ajrore të mbrojtjes.
Ata ranë dakord që të organizojnë një takim të veçantë mes ekipeve të tyre për të vijuar punën në këtë drejtim.
Në bisedë është përfshirë edhe çështja e bashkëpunimit në prodhimin e armëve, ku Zelensky shprehu gatishmërinë për projekte të përbashkëta me Shtetet e Bashkuara, përfshirë blerje dhe investime në sektorin e mbrojtjes.
Kreu i shtetit ukrainas përfitoi nga rasti për të përcjellë urimet e tij për Ditën e Pavarësisë së SHBA-së dhe për të falënderuar Uashingtonin për mbështetjen e vazhdueshme ndaj vendit të tij.
“Ne kemi bërë shumë së bashku me Amerikën dhe mbështesim çdo përpjekje për t’i dhënë fund dhunës dhe për të sjellë një paqe të qëndrueshme dhe të drejtë. Ukraina mbështet iniciativat amerikane për një marrëveshje të drejtë dhe të nevojshme për paqe,” theksoi Zelensky.
