Ditën e sotme Presidenti ukrainas, Volodymyr Zelensky, ka publikuar një fjalim të ri, pas përfundimit të ditës së 17-të të agresionit rus në Ukrainë, si dhe pasi forcat ruse kanë kryer një sulm me raketa në një qendër trajnimi ushtarak jashtë qytetit të Lviv.
Zelensky shpalli një numër dekoratash ushtarake për ushtarët ukrainas – shumica prej tyre u dhanë pas vdekjes. Zelensky komentoi gjithashtu situatën në Kherson, një qytet ukrainas nën kontrollin rus.
Autoritetet lokale kanë thënë se një referendum po planifikohet nga Rusia me synimin për ta bërë rajonin një republikë separatiste të ngjashme me disa pjesë të tjera të Ukrainës lindore – Donetsk dhe Luhansk.
“Pushtuesit në rajonin e Khersonit po përpiqen të përsërisin përvojën famëkeqe të formimit të pseudo-republikave”.
“Nuk do ta nënvlerësoj kërcënimin. Dhe nuk do t’i ekzagjeroj arritjet. Ne jemi njerëz të ndershëm, jo si Ministria e Mbrojtjes e Rusisë. Që gënjen të gjithë – miliona qytetarë të saj dhe madje edhe kreun e Federatës Ruse. Kështu që unë them sinqerisht: Ne ende duhet të luftojmë. Çdo ditë dhe çdo natë duhet të kërkojmë mënyra për t’i shkaktuar dëm maksimal armikut. Në të gjitha fushat e mbrojtjes. Pranë Zhytomyr dhe Kiev, afër Chernihiv dhe Sumy, afër Kharkiv dhe Luhansk, pranë Donetsk dhe Mariupol, në jug të vendit dhe në vijën e frontit diplomatik”.
