Partneritetet Publikë Privat padyshim që janë kthyer në shqetësim real jo vetëm për ne që jemi vendas, por edhe për ndërkombëtarët.
Së fundmi, zëdhënësja e Komisionit Evropian, Maja Koçijançiç, në një intervistë për gazetën “Shekulli” ka thënë se modeli i PPP-ve në vendin tonë ka një sërë problemesh shqetësuese.
Pikërisht për këtë arsye edhe Komisioni Evropian ka shfaqur dyshimet e tij në lidhje me procesin e zhvillimit ekonomik të vendit tonë duke publikuar kështu një sërë raportesh të përpiluara së fundmi.
Sipas Koçijançiç, PPP-të mund të ndihmojnë në kapërcimin e hendekut, por numri i lartë i tyre mund të kthehet më pas një kërcënim real fiskal.
“Përdorimi i partneriteteve publiko-private dhe i kontratave të koncesionit mund të ndihmojnë në kapërcimin e hendekut të madh të infrastrukturës që Shqipëria përballet dhe, për të cilën financimi publik aktualisht nuk është i mjaftueshëm.
Megjithatë, numri dhe vlera e shpejtë e PPP-ve sjellin rreziqe të konsiderueshme fiskale në formën e detyrimeve të kushtëzuara për buxhetin e shtetit. Komisioni beson se kontrolli financiar i këtyre angazhimeve duhet të shtrëngohen për të zbutur këto rreziqe.
Qeveria shqiptare pajtohet me këtë vlerësim dhe Ministri shqiptar i Financave dhe Ekonomisë informoi Komisionin se qeveria po krijon strukturën e nevojshme institucionale për kontrollin dhe monitorimin më të mirë të PPP-ve.
Një shqetësim shtesë i Komisionit Evropian është se kontratat e PPP-së, duhet të prokurohen në mënyrë transparente në përputhje me standardet e prokurimeve publike shqiptare” – thotë Koçijançiç.
