Zëdhënësi i Presidencës, Tedi Blushi ka dërguar një mesazh për kryeministrin Rama para zgjedhjeve të 25 prillit. Blushi ka postuar një foto nga spitali Psikiatrik i Vlorës dhe krah saj shkruan se është bërë gati dhoma ku Rama do të shtrohet në 26 prill. Më tej Blushi shkruan se ora e gjykimit po afron dhe se përballja me presidentin Meta është e pashmangshme.
Postimi i plotë:
“I sëmuri i Surrelit, që tmerrohet nga afrimi i 25 Prillit e ka bërë gati edhe dhomën ku do të shtrohet më 26 Prill, në kërkim të rrethanave lehtësuese për vjedhjet kriminale, që u ka bërë shqiptarëve. Në mungesë të kartelës mjekësore, Damjan Qameti, por dhe Çimkat e tjerë, e dinë shumë mirë vendin ku do të përfundojnë! Skenari i tjetërsimit të vullnetit të vlonjatëve është zbuluar dhe përvëluar bashkë me Çimkat e Damian Qametit.
Ora e gjykimit popullor po afron! Përballjes me Presidentin Meta nuk i shmangeni dot!
Së shpejti do takohemi te Sheshi i Flamurit! Presidenti Meta, si përherë, në krye të mbrojtjes së zgjedhjeve dhe rendit kushtetues! Vlora do t’ja bëjë fora!,”-shkruan Blushi.
Vetëm pak ditë më parë, nga Vlora kryeministri Rama e cilësoi Metën si kandidat të opozitës në këtë qark. Nuk vonoi edhe përgjigja nga presidenti i cili po nga Vlora tha se do të jetë aty deri në 26 prill për të garantuar votën e lirë.
