Autoritetet e Mjekësisë Ligjore të Kosovës, kanë bërë me dije se pas gërmimeve të përcaktuara në disa koordinata, kanë arritur që të zbulojnë një varr masiv në Kizhevak të Serbisë.
Mësohet se gjatë gërmimeve janë zbuluar 5 varreza që dyshohet se janë të personave të vrarë gjatë luftës së fundit në Kosovë.
Autoritetet po vazhdojnë gërmimet për mbetjet mortore të personave ndërsa gjetja e 5 varrezave është konfirmuar edhe nga drejtori i Institutit të Mjekësisë Ligjore në Kosovë Arsim Gërxhaliu.
“Deri më tani janë zbuluar pesë varreza. Jemi duke gjetur mbetje mortore dhe do të punojmë deri sa të na lejojnë kushtet atmosferike”, ka deklaruar Arsim Gërxhaliu.
Kujtojmë se në territorin e Serbisë në katër vende të ndryshme janë zbuluar varreza masive me trupat e 941 shqiptarëve të vrarë në Kosovë gjatë luftës në vitin 1999.
Më shumë se 13,000 njerëz besohet që kanë vdekur gjatë luftës në Kosovë. Luftimet përfunduan në 1999 pas sulmeve ajrore të NATO-s kundër Jugosllavisë. Shumica e viktimave ishin shqiptarë etnikë dhe ende qindra viktima rezultojnë të zhdukur.
Varri masiv më i madh nga lufta i gjetur deri më tani, që përmbante trupat e më shumë se 800 shqiptarëve të Kosovës, u gjet në 2001 në një kompleks policie afër Beogradit. /GazetaReforma.com/
