Policia e Elbasanit në bashkëpunim me atë të Librazhdit, kanë goditur një rrjet të trafikimit të mjeteve motorike.
Gjatë aksionit të koduar “Rrajca 2019”, është arrestuar 53-vjeçari me iniciale Xh.B., ndërsa është shpallur në kërkim A.R. banues në Strugë në Maqedoninë e Veriut.
Këta persona nëpërmjet kufirit të gjelbër kanë organizuar trafikimin e disa automjeteve, nga Maqedonia e Veriut në drejtim të Shqipërisë.
Në bazë të hetimeve të policisë rezulton se në trafik janë të përfshirë edhe persona të tjerë.
Në cilësinë e provës materiale, është sekuestruar një mjet tip “Volkswagen Passat”, i cili ishte vjedhur në Maqedoninë e Veriut.
Materialet hetimore ndërkohë i kaluan Prokurorisë së Elbasanit, për veprime të mëtejshme.
Njoftimi i policisë
Elbasan
Finalizohet operacioni “Rrajca 2019”.
Operacioni për goditjen e veprimtarisë së paligjshme në trafikimin e mjeteve motorike.
Operacioni nga Seksioni për Hetimin e Narkotikëve dhe Trafiqeve të Paligjshme, në Drejtorinë Vendore të Policisë Elbasan, në bashkëpunim me Komisariatin e Policisë Librazhd.
Një shtetas në pranga dhe një i shpallur në kërkim.
Në vijim të punës për parandalimin, evidentimin dhe goditjen e trafiqeve të paligjshme, Seksioni për Hetimin e Narkotikëve dhe Trafiqeve të Paligjshme, në bashkëpunim me Komisariatin e Policisë Librazhd, finalizoi operacionin “Rrajca 2019”, si rezultat i të cilit u bë arrestimi në flagrancë i shtetasit:
Xh. B., 53 vjeç, lindur në Prrenjas, Librazhd.
Dhe u bë shpallja në kërkim e shtetasit A. R., banues në Strugë, Maqedoni e Veriut.
Nga hetimet e kryera ka rezultuar se këta shtetas në bashkëpunim dhe me persona të tjerë kanë organizuar trafikimin e disa automjeteve nëpërmjet kufirit të gjelbër jashtë pikave të kalimit kufitar, nga shteti i Maqedonisë së Veriut drejt Shqipërisë.
Në kuadër të operacionit është sekuestruar në cilësinë e provës materiale një autoveturë e markës Volksëagen Passat, me targa të shtetit të Maqedonise së Veriut, në pronësi të një shtetasi maqedonas. Automjeti është vjedhur në shtetin e Maqedonisë së Veriut dhe me pas trafikuar në Shqipëri.
Vijon puna për identifikimin dhe arrestimin e personave të tjerë të perfshirë në këtë veprimtari kriminale, si dhe sekuestrimin e disa automjeteve të trafikuara nga ky grup personash (për të cilët nuk jepen të dhëna për arsye hetimi).
Materialet hetimore i kaluan Prokurorisë Pranë Gjykatës së Shkallës Parë Elbasan, për veprën penale “Trafikim i mjeteve motorike“.
